COPLAS DOS MAIOS DE LEIRO 2006

CEPAS DO RIBEIRO

Medrade, cepas, medrade,
que ven o maio florido,
e se chegade ó outono
beberemos un bo viño.

Qué importa que gañe a liga
o Madrid ou Barcelona,
o que importa pra vos é
moito sol e pouca choiva.

Que aproben os estatutos
fora ou dentro de Galicia
que eu vouvos ter atendidas
dende agora ata a vendima.

Se sobe o petróleo ó ceo
será para forrar cartos,
que se non hai gasolina
pódese cavar co sacho.

E se o viño que vos dades
véndese cada vez peor,
non será por culpa vosa,
que vos sodes do mellor.

E ti, treixadura preta,
ti, tarrantés, cagarrizo,
seguide medrando arreo
pra facermos un bo viño.

E ti, meu caiño longo
e brncellao tan tantigo,
pedídelle ó sousón
que vos dea colorciño.

Que se maten eles todos.
vos dádeme bos racimos,
que en canto o médico deixe
bebemos eu e os amigos.

Leiro, maio 2006

AQUI ESTAMOS

Chegaches maio,
tan esperado,
fai que se fixe
en nós o xurado.

Maio, maiolo,
queremos que
non suba máis
o petróleo.

Maio, maiolo,
trae máis nenos,
que cada vez
xomos menos.

Xa hai coidadoras
no autocar:
compren nenos
a quen coidar.

Queremos neste colexio
unha alameda facer,
que sexa "pros" nenos
un bo sitio de lecer.

Maio, maiete,
que se vendan
ben o branco,
o tinto e o clarete.

(C.E.I.P. EMILIA PARDO BAZAN DE LEIRO, maio 2006)

FIOS DE SEDA

Xa alá no século quince
a chamada Celestina
tiña un oficio curioso
que era arranxar vaxinas.

Con agullas delgadiñas,
fios de seda encerada,
facíalle virgos novos
ás mulleres xa gastadas.

E que o facía tan ben,
¡condanada Celestina!,
que vendeu tres veces virxen
a unha criada que tiña.

Unha doutora en Madrid,
rúa Ourense, pra máis señas,
ven cobrando dous mil euros
por facerche a cousa mesma.

Quince minutos de nada
e unha anestesia local
e xa tes recuperada
a túa virxinidá.

Xa se deu un caso raro
de quen vendeu o seu corpo
e a dous billetes o arreglo
gañou os corenta e oito.

Alá en Estado Unidos
púxose o tema de moda
e a ciruxía do himen
vailleindo vento en popa.

O tema xa foi portada
en "The Wall Steet Journal"
pero inda pra algunha xente
é un tema algo vanal.

E se falamos de homes
por aquelo da igualdade,
se é virse ou non o é
¡cómo c...... se sabe!

(Maios do Ribeiro 2006. Estas coplas levaron o segundo premio. Nesta páxina faltan as que levaron o primeiro premio, que non as teño porque estás esgotadas)

"O que converte a vida nunha bendición non é facer o que nos gusta, senón que nos guste o que facemos" (GOETHE)

Benvid@, estás na túa casa

a@galicias.com

Contador